Poslovne vijesti - Makedonija

Благо поскапуваат БС-98 и мазутот, поевтинува екстралесното

Малопродажните цени на еуросуперот БС-98 и на мазутот благо се зголемуваат, цената на екстралесното се намалува, а на еуросуперот БС-95 и на дизелот останува непроменета.

Вака одлучи Регулаторната комисија за енергетика во понеделникот на редовната седница посветена на корекција на цените на нафтените деривати.

Согласно одлуката, малопродажната цена на еуросуперот БС-98, во однос на цената утврдена се зголемува за 0,5 ден/лит и со тоа сега изнесува 78,50 ден/лит.

Малопродажната цена на екстра лесното масло за домаќинство (ЕЛ-1) се намалува за 0,50 ден/лит и со тоа цената на екстра лесното масло за домаќинство (ЕЛ-1) изнесува 57,00 ден/лит.

Цената на мазутот М-1 НС се зголемува за 0,346 ден/кг, со што од вторник ќе се продава по 39,803 денари за еден килограм.

Литар еуросуперот БС-95 и натаму ќе се продава по цена од 76,50 денари, а цената на дизелот останува 68,5 денари за литар.